Che di da pumpa! Üna clap brajada da frizzas e traideschins va serpagiond dal god sü e passond l'alp inavant vers la fuorcla Sassalba. Il böt es il Piz Terza, ün punct majestus sü ot sur la Val Müstair. Tuot las nüvlas chi vaivan manà her üna bella brüs-china as vaivan retrattas sur not e fat plazza al sulai, da möd cha las relaziuns d'eiran stupendas. Be il vent paraiva da nun ans vulair cuir üna buna marenda sül piz e soflaiva da quai fich pac simpatic.

La skiada cun üna schurma bellas stortinas ans ha manats lura fin giò Valchava. Puolvra e sulzin e lapro che vulaivna amo daplü: 1000m amunt e 1500m aval, üna simla relaziun nu daja nimia mincha jada! Davo la gita vaina amo fat visita al harem da Seppatoni, üna colonia da 13 asens da tuottas etats, da l'asna portanta fin pro'l 'herzighin' da pacas eivnas e dad ün schef, Seppatoni.