Am poss eu svelt preschenter? Mieu nom es Dodo Boss, eu sun nada e creschida sü in engiadin’ota (que’ns oda bain?), d’he fat ün giarsunedi i’l hotel, lavuro düraunt 22 ans scu magistra da skis e da snowboard. Düraunt la stagiun da sted lavurav‘ eu scu servitura in differents lös dad ota qualited (gult millau). Mia passiun sun las muntagnas, la natüra inua ch’ella po aunch’esser natürela, il contact culs giasts da tuotta sort.
Ils ultims quatter ans d’heia clet experienzas illa chamanna Boval scu agüdaunta e illa chamanna Planura scu guardgia da chamanna, sün 2947 msm. Üna chamanna dals extrems. Ova, electricited, ora, solitüd, dis lungs, ma eir üna natüra intacta, glatschers scu illa arctis e bels contacts cun giasts cuntaints.
Gia aunz scu ir sülla Planura vaiv eu penso vi da la Chamanna Toui, scu ün sömmi, chi forsa nu vegn mé vaira.-Ma el es gnieu vaira. -Che es uossa la senda ch’ eu less ir? Eu am mett avaunt, da mner quista chamanna respectand las ressoursas da la chamanna, da la natüra e dal persunel. Eu vuless cha la chamnna Tuoi dvaunta la seguanda chamanna culla garanzia da qualited «Goût mieux», (la prüma es la Lidernenhütte in Svizra centrala, scu ch’eu manag, sün terza plazza illas pernottaziuns annuelas), mieu grand exaimpel. Ma la fin da la senda nuns vezza auncha per furtüna. Chi so, forsa poss eu giavüscher il bainvgnieu a l’ün o l‘ oter da vus. Eu m’ allegress in mincha cas! Eu ingrazch fich alla suprastanza per lur fiduzcha e speresch, dad accumplir lur e vossas aspettativas.
Dal rest, ho qualchün da vus üna buna rechetta per canödels da chaschöl? Eu füss fich grata, scha vus am tramettessas üna proposta a l’adressa seguainta: dorothea.boss@bluewin.ch
Cordiels salüds,
Dodo, guardgia da chamanna Tuoi
La Punt, in favrér 2010