de-CH rm-CH
Raports da turas
Main » Turas da la Secziun » Rapport Details
  

Piz Morteratsch (3751msm)

Piz Morteratsch (3751msm) 19/20 avuost 2017
David Langenegger
Rapport da tura - Piz Morteratsch (3751msm)

Data: 19/20 avuost 2017

Guida: Jachen-Andri

Participant(a)s: Alberta, Andrea, Armon, Christina, Cristoffel, David, Domenic, Gian, Giovanna, Jon Armon, Marina, Mia e Renzo

Davo nossa reuniun a la staziun da Scuol ans vaina mis in viadi cul auto vers l'Engiadin'Ota. Davent dal parkegi Morteratsch a Puntraschigna eschan chaminats in direcziun da la chamonna Boval. L'ora vess pudü esser megldra quella sonda, ma las previsiuns per il di davo ans han fat spranza. Rivats sülla chamonna Boval vaina laschà gustar la buna tschaina e vain fat impringias cun ün magöl vin.

Il di davo eschna stats sü a bunura bod e vain bandunà la chamonna davo culazchun. Al cumainzamaint amo cun glüm da frunt e per gronda part circumdà da tschiera ans vaina mis in viadi vers la Fuorcla da Boval. Plü amunt cha no eschan rivats e daplü cha la tschiera as ha scholt e dat liber la vista sülla gruppa dal Bernina. Apaina cha no eschan rivats in cuntuorns plü stips ans viana mis in sua. Uschè sun tuots rivats sülla fuorcla ingio cha nus vain fat üna cuorta posa. Cuntinuà vaina nossa tura cun s-charpellas sur il Vadrettin da Tschierva fin sül Piz Morteratsch. Satisfats dad esser rivts sül piz ed imprschiunats dal panorama ed impustüt da la vista sül Piz Bernina e la Crast'Alva vaina mangià nossa marenda bain meritada. Natüralmaing cha nus ans vain eir tut temp per far üna o l'otra fotografia. Aval eschna lura darcheu its in gruppas da trais medemmamaing sco fingià pro la muntada. Nossa ultima posa vaina fat illa chamonna da Tschierva cun vista sül Vadret cul listess nom e sias numerusas sfessas. Rivats in Val Roseg d'eiran tuot ils participants cuntaint sco ün rai cha nos manader vaiva organisà la charrozza da la vituraria Omnibus da Puntraschigna per l'ultima etappa da nossa tura. Uschenas eschan nus rivats furtünats e cun bellas regordanzas inavo al lö da partenza. Grazcha fich a nossa guida Jachen-Andri per sia organisaziun exemplarica e la realisaziun da la gita e grazcha fich a tuot ils partecipants per la buna cumpagnia.
Publichar
 

Per far svess üna contribuziun per plaschair il prüm as registrar quia. Scha fingià resgistrà, ilura annunzchar quia.