de-CH rm-CH
Raports da turas
Main » Turas da la Secziun » Rapport Details
  

Corna di Capra (3188 msm)

Livigno 9 favrer 2014
Christoffel Denoth Vnà

A bun’ura naiveva, ma fat gio ais fat gio. Cun partir aval, davent da chasa, n’ha laschà rodlar las rodas da l’auto be planin aint illa naiv frais-cha. Be na bloccar, uschigliö schlitraiva que accelerand. Per furtüna d’eira, sün via maistra fingià gnü sü la rotta e no eschan lura rivats sans e salvs a Zernez.  Saviand cha Christian ha tuot in man, ais üna granda brajada partida per Livigno e da là culs skis tuots in fila aint da la val vers Alpe Vago. Insü ha lura Christian miss gio ün stizi a pendenza constanta . Be tschertas stortas d’eiran da tour fand la vouta a piz, quai voul dir: Sco prüma volver il ski sura e metter sü tuot il pais sün quel. Lura cun tschella chomma as da il cloc da chalchagn davo giò, cha’l piz dal ski riva bod sü pro’l nas. Sventuland il ski elegantamaing intuorn la chomma chargiada as stordscha eir il corp sura e fatta es la fatschenda. Sch’ Ella ais grattiada as po dafatta esser ün pa superbi e sperar cha quel chi vain davo haja viss tuottafat e possa be far davo. (Eu fetsch quint cha cun quista descripziun sapcha  mincha principiant  far la volva in qualunca costa stipischma). Cur cha davo üna ter tratta, i naiveva amo adüna ün zich ed intuorn ed intuorn d’eira grisch, Christian ha dit : «uossa be amo 700 m d’otezza» han ils blers guardà ün pa stut, ma ingün nun ha fat gnical. Rivats sün quista Corna s’ha que trat sü, e sco tenor previsiun da l’ora, vain vis, ingio cha no ans avaivan ardüts e vain dafatta pudü far ün per fotografias. A val es quai i sco la bischa: buna vista, puolvra loma, bellas stortas, ün skiunz surprendaiva a l’oter e fingià ans rechataivan a l’ustaria. Che schaschinada per ün cafè ed ün biscutin!

Grazcha fich a Christian ed a Nina

Publichar
 

Per far svess üna contribuziun per plaschair il prüm as registrar quia. Scha fingià resgistrà, ilura annunzchar quia.