Piz Chapisun (2'931 msm)

Jon Andri Fliri | 21.08.2025

Il tschêl d'eir'amo cuvernà cun nüvlas ed i plovaiv' amo per part, ma la previsiun ha impromis ün bel di. Christoph es gni cun seis auto gio da La Punt ed ha tut cun sai a Niklaus, chi'd es gni cul e-bike nan da la Val Müstair fin Zernez, ed a la staziun da Guarda ha'l chargià aint amo a mai. Partits eschna davent da la chasa da Not Armon. El ans ha manà sü sur Guarda, tras la prada da Salön, sü da la senda vers la chamonna dal bescher e lura sü per costas stipas fin sül spi dal Chapisun. Ils prüms uzuns ans han dat ün prüm insaj da l'utuon, chi s'approsma plan planet. Adüna darcheu crodaivan nossas ögliadas süls ot albers d'atschal chi stan fingià sur vainch ons süllas costas süsom il Chapisun per minar giò las lavinas e proteger in quella maniera la via chantunala e la lingia dal tren dad üna lavina gronda dürant l'inviern. Quai ha eir svaglià ün'o tschella discussiun per o cunter quista technica moderna, cun avantags e dischavantags. Süsom il spi d'eira lura da rampignar amo sur qualche grip e crap oura. Ma Not Armon ha muossà bain la via, uschè cha intuorn las desch vaina pudü dar il bütsch al piz süsom pro l' homin da crap. Tras la tschiere e las nüvlas oura vaina adüna darcheu vis ad ün' o tschella muntogna intuorn no e pudü giodair la vista sü e giò per l'Engiadina. Cun quai cha no d'eiran dal temp nan amo bain landervia, vaina tuots insembel spontanamaing decis da far la traversada ed ir giò vers südvest, sur il Pra da Barba Peder e la Gonda Cotschna infin pro la senda sura da la via Engiadina. Da la eschna lura darcheu tuornats vers la chamonna dal bescher e luro giò vers Guarda. Per finir la gita ans han Sandra e Not Armon amo invidats a baiver alch in lur bel üert cun vista fantastica sur la val oura.

Grazia fich a nos manader per la bella gita ed a tuots per la flotta e divertenta cunpagnia.

Participants: Not Armon Willy (manader), Sandra Willy, Niklaus Kern, Christoph Keller, Jon Andri Fliri