La Tuoi-Ronda
Silvano Stecher | 28.07.2021
La bunura bod eschan partits cun duos bus da Scuol in direcziun Guarda, Chamonna Tuoi, per lura instradar da cumpagnia la «Tuoi-Ronda».
Sco prüm ans vaina miss in viadi in direcziun Plan-Furcletta per rivar sülla Fuorcla da Tuoi. Dürant quist’ etappa vaina gnü l’occasiun da dudir che paschiun e colliaziun cha mincha singul da nus ha per las muntognas e per nossa regiun.
Rivà sül spi, vaina pudü giodar ils prüms razs da sulai e’ns preparar per ir sur il vadret. In gruppas da trais e duos persunas vaina traversà suotoura la Hinter Jamspitz, per rivar sül piz. Ils ultims meters staivan amo ir sün grip. Il timing d’eira perfet, uschè ch’ans vain laschà gustar nos «Znüni». Üna vista grondiusa es statta la paja per nossas fadias: ün salüd al Piz Buin ed ün al Piz Linard !
Continuà nossa gita vaina sül Jamtalferner intuorn la Vorder Jamspitz aint il süd ed in vista fingià nos prossem böt, la Dreiländerspitz. Davo avair traversà il cunfin dal Tirol ed il Voralberg sülla Ochsenscharte esa i stip amunt tras la naiv. Ils ultims 200m sün terrain dür e sainza naiv. Trenta meters avant il piz as vaiva amo ün passagi ün pa plü stret. Finalmaing sun tuots rivats sül piz. Il lö d’eira s-chars ed ün ferm vent ans ha dat il bainvgnü.
Davo avair montà las s-charpellas, avant sco ir sül vadret vaina pudü giodair üna sglischida aval. Che giodimaint ! Uossa inavant in direcziun Fuorcla Vermunt.
Passa il vadret e rivà sülla fuorcla as vaiva l’ ocassiun per dar ün ultim sguard illa buscha per verer cha alch marenda es amo vanzà. Da la Furocla Vermunt esa lura i in drecziun chamonna Tuoi.
Il timing darcheu perfet ! Güsta avant la plövgia eschan rivats giò’n chamonna. Aint in stüva ans vaina lura tut temp per star da cumpagnia e giodair ün bun rösti da Tuoi.
Participants: Jachen Andri Gisep (guida), Christina Müller, Flurin Marugg, Christina Epting, Silvano Stecher, Domenic Stecher, Corrado Ghilotti, Andrea Bonifazi, David Langenegger, Gian Minar, Patrick Müller, Jon Andri Fliri, Beniamin Ambühl