Skip to main content

Cuorsa "Tras Scuol"

12.05.2021
Cuorsa "Tras Scuol"

3.6 km / 7.2 km Running & Nordic Walking Kids Run Covid-19 Edition www.tras-scuol.ch

Chars amis dal sport, 

eu sun Svenja Ammann, n'ha 19 ons e stun a Tarasp. L'on 2019 n'haja organisà per la prüma jada il "Tras Scuol". Il "Tras Scuol" es üna cuorsa populara chi maina impustüt tras la cità veglia da Scuol. Eu vaiva organisà quista cuorsa i'l rom da mia lavur da matura. Perquai cha las reacziuns sülla cuorsa d'eiran uschè positivas, am n'haja decis dad organisar darcheu la cuorsa. 

I dà las distanzas 3.6 km (üna runda) e 7.2 km (duos rundas). I's po cuorrer la cuorsa o eir far ella in fuorma da "Nordic Walking". I da eir üna cuorsa pels uffants dad U7 fin U12. Quista ediziun es pero ün pa differenta pervi da corona. Davent da las 9 fin a las 13:30 pon mincha trenta minuts partir 15 persunas insembel. Uschè esa garanti cha las gruppas nu's maisdan. Ils blocs a las 13 e 13:30 sun be pels Nordic Walkers. Pro l'annunzcha as poja dir, in che bloc chi's less partir.    I nu dà ingün program accumpagnant (excepziun: rangaziun dals uffants e scha la situaziun permetta eir quella da la cuorsa principala). Scha la rangaziun nu po avair lö, vegnan ils premis tramiss per posta. Eir aspettaturs nu sun permiss (be üna persuna da chüra per athlet(a)).

Scha'l "Tras Scuol" nu po tuottüna avair lö, lura tschüffan quells chi s'han annunzchats inavo uschè bler da la taxa da partenza sco pussibel o i pon eir dunar quels raps. 

Il guadogn net va favur da la "Schweizerische Herzstiftung" e va i'l fonds da las loipas da cour. 

Als 15 e 29 mai ed als 5 gün han lö visitas dal traget. Lö d'inscunter es mincha jada las 18:30 pro la chasa da scoula a Scuol. Ün preavis es necessari perquai cha'l nomer da partecipants es limità. Per visita as pon partecipar max. ot cuorridurAs e quatter Nordic Walkers.

I'll annexa as rechatta amo il flyer da l'occurenza. Ulteriuras infuormaziuns as rechattan sülla pagina iniziala: www.tras-scuol.ch

Salüds sportivs, Svenja Ammann

 

inavo