Scuol - Tuoi / Jamspitze
Jon Andri Fliri | 16 fin 17 marz 2024
Reuniun sonda bunura las 08:30 pro la Pendiculara e muntada sü Schlivera ed inavant sü Mot da Ri cun la s-chabellera. L'ora d'eira so so, la la, ma inscuntrà vaina fich bella naiv da poulvra. Davo la muntada sü sper il Piz Clünas vaina davo üna cuorta schmuntada giò pro'l lai da Minschun (cun ruottadüra d'ün bastun) cuntinuà la muntada sül Minschun pitschen. La skiada giò per costas cun üna bella puolvrina han cumpensà l'ora surtratta cun pac sulai. Cun agüd cumünaivel ed indschegn special d'eira reuschi da cumadar provisoricamaing tant il bastun ruot da Fredi ed eir la liadüra defecta da Christoph. Uschè han listess decis tuots da cuntinuar la gita da cumünanza sü vers la Furcletta. Causa cha l'ora's pegioraiva vi e pü, vaina stuvü sepulir l'idea, da traversar fingià la sonda vers il Jamjoch ed uschè vaina tut la via directa vers la chamonna Tuoi. La viana giodü la cupagnia in chamonna cun üna buna tschaina, servida da Denise cun seis team illa 'Tuoi'.
Fingià la saira as muossaivan per part la glüna e las stailas e la prosma bunura as preschantaiva ün di da pumpa. E dafatta ün bastun nouv per Frederic ha quai dat da la butia ambulanta da JonSport illa chamonna, uschè cha per la cuntinuaziun da la gita nu daiva quai pü ingüns intops. La muntada sü per las costas cun naiv frais-cha a dretta dal Piz Tuoi e vers la fuorcla sper la Jamspitze d'eira ün giodimaint. Sül Piz Jam davo eschna rivats sco prüma gruppa dad üna tera migraziun da turists da skis per part sü da Tuoi ed eir da la Jamtal sü. E davo üna cuorta skiada giò'l cuolm ha quai gnü nom da tscherchar il prüm il cröch ominus per suar giò. Grazia a la spalada intensiva da Patrick vaina chattà l'oget bramà e drizzà aint las suas per schmuntar giò sül vadret. La costa vergina d'eira davo però ün giodimaint special ed uschè vain pudü giodair üna skiada da pumpa fin giò'n chamonna. Davo avair giodü ün bun radler, caffé o üna rösti eschna lura partits cuntaints da la Val Tuoi oura vers Guarda.
Grazcha fich a Patrick e Silvano per la guida ed a tuots per la buna e flotta cumpagnia. Ad ün'otra jada!
Participants: Patrick Müller (manader), Silvano Stecher (manader), Claudia Rest, Christoph Keller, Frederic Stecher, Jon Andri Fliri