de-CH rm-CH
Tourenberichte
Main » Turas da la Secziun » Rapport Details
  

Aletschhorn, avuost 2012

Vallais 17 fin als 19 avuost 2012
Cristina Gregori (text), Notarmon Buchli (fotografias)

Rampignar sül grip, greiv, dalöntsch – quai sun stattas las indicaziuns per la gita giò’l Vallais!

Insomma, n’haja pensà, sarà quai alch eir per mai? Sch’Andri nun es da la partida am fetscha pel solit daplü pissers co quai chi fess dabsögn.

Però annunzchà es annunzchà!

Indicaziuns datagliadas, sco üsità, sun gnüdas duos dis avant per sms: tour chaplina, sezzin, carabiner, s-charpellas, glüm da s-charsella, partenaz da Scuol cul prüm tren da las 5.26 h.

Aint il tren n’haja inscuntrà a Duri ed a Jon Armon, sü Ardez sun gnüts pro Armon e Jörg ed a Sagliains, che schligerimaint – Christian! A Landquart giaina aint il vagun restorant, cafè per sdruogliar dal tuot ha fat nair dabsögn. A Turich es gnü pro Not Armon e no cuntinuain nos viadi vers il Vallais. Mario es gnü pro a Berna, la cumpagnia crescha ad ün crescher! Da Brig giaina cul auto da posta sü stipüras vers Blatten. Sabina e Cla sun eir rivats per cuntiunar nos viadi cun la pendiculara da Belalp 700 m insü, infin sün 2000 msm. Casü pigliaina cun no eir amo a Ruth ed Ariana, la cumpagnia es uossa cumpletta!

Be schlantsch pigliaina la senda suot ils peis ed chaminain vers la chamonna dad Oberaletsch, per part sün üna senda nouva, construida pür dal 2005. Üna senda panoramica, cha, davo avair bandunà las blaischs e la scossa da bescha, cuntinua aint il grip.

5000 uras da lavur, 1000 pösts da fier ed üna tonna dinamit hana dovrà per realisar quista senda aint il grip chi’s tira sur 4 kilometers cun üna largezza da 60 centimeters. 15 lavuraints han schaschinà dürant trais mais per cha l’access in chamonna vegna plü confortabel.

In trais uras e mez rivaina in chamonna e giodain üna vista fantastica vers il Nesthorn e lura, stordschond il cheu a dretta, nos böt dal di davo, il  famus Aletschorn!

Davo üna cuorta not partina a la 2.30 h, il prüm aval sur varsequantas s-chalas s-chalins e s-chaluns, 160 m d’otezza aval, infin sül vadret. Per chommas lungas sco quellas da Jörg – insomma ingün problem!

Tramplunand davo Christian, sainza far gronds pleds, in s-chüra bocca d’luf, dudind la rumur dal vadret e’l sgrizchöz da las s-charpellas sül glatsch e sülla crappa, accumpagnats d’ün tschêl staili, minchün aprofondi in seis impissamaints, rivaina al pè da la muntogna.

Pür cur cha no rampignain fingià üna pezza sül grip, vegna plan planet plü cler e’l tschêl sur no as transmüda dal nair in ün blau-violet e dvainta adüna plü cler, il di alva - ün di da bellezza sco chi’d es stat da preverer!

Rivats sül piz eschna davo bunas ses uras.

La vista es fantastica, grondiusa, .... vairamaing nu daja pleds per descriver quist sentimaint, vezzond tuot il panorama da nossas alps! Il Piz Ela vezza sco prüm... eir sch’Armon e Jörg han hoppers da crajer a mai. Ma Duri cun seis I-Phon constatescha subit ch’eu vezzarà la dretta muntogna. Il Kesch, l’Üertsch e tuot la pizza da l’Engiadin’Ota ... l’Ortler e’l Grand Zebrù, e’l Linard.... però , che varguogna! Gnanca pel diavel nun vain indichà il nom pel cuntschaintischem Piz Linard! Duri varà da passar pled culs respunsabels da quist App!

Saja sco chi vöglia, eu nu n’ha fadja da tils crajer chi’s tratta propcha dal Linard...!

Vaira precis a las quatter tuornaina darcheu in chamonna e giodain sco prüma ün bel bogn rinfras-chand aint illa bognaduoira davant chamonna. Eu less bod dir chi sarà stat ün dals bogns cun la plü bella vista da tuot il muond!

Il di davo pigliaina cumgià da la bella chamonna cun ün’ultima ögliada sün nos bel piz e tuornain a Belalp e cul tren darcheu vers chasa. Tuot chi’d es cuntaint dad esser ad ura a chà. Armon posta fingià per telefon la buna tschaina pro Lucia! Però il tren a Landquart nu va plü inavant, la lingia es interruotta ed i voul amo üna jada ün zich pazienza. Cun duos uras retard rivaina finalmaing in Engiadina ed eu speresch, cha tuots hajan istess amo giodü üna buna tschaina!

Grazia fich a Christian per quista gita inschmanchabla, üna jada daplü üna gita fantastica, id es stat la can’e mez!

Cristina Gregori
Publizieren
 

Um einen Tourenbericht zu publizieren bitte zunächst hier registrieren. Falls bereits registriert, dann hier anmelden.