de-CH rm-CH
Tourenberichte
Main » Turas da la Secziun » Rapport Details
  

Piz Davo Lais

Engiadina Bassa 26 favrer 2017
Christoffel Denoth

Previs d‘eira da far il Piz Terza davent da Lü, ma las relaziuns da naiv han chaschunà a Jon dad ir sül Piz Davo Lais.

I ha lura gnü nom ch‘eu fetscha il rapport. Sainza s-chüsa ün pa ün pa valabla nun haja savü da‘m dostar. Ed uossa ün rapport. Che es quai? Cun quist pled suna gnü confruntà la prüma jada in recruta. Adurezzas la duman, no d‘eiran amo tuots indurmanzats, gniva sbragi aint da porta dal cantonamaint: „Ufschtò, rapport fors näscht.“ Id eira da siglir our d‘let e star dret sü sco üna chandaila, in pidschama o be in chotschas suot. Il sbragunz faiva ün per pass in stanza, guardaiva da quai sever intuorn, dombraiva e faiva alch descripziun in seis taquint. Scha tuot d‘eira in uorden giaiva‘l darcheu da port‘oura. No ans stuvaivan sduvlar, perchè in paca pezza d‘eira dad esser ruelà ed in culuonna da quatter davant la cantina. I gniva annunzchà al schef da cuschina cha la secziun trais saja pronta per la cullazchun. A mai nu d‘eira cler scha quist rapport eira  la descripziun  cha‘l corporal faiva, scha quai d‘eira la sfuriada chi d‘eira da far, o scha quai d‘eira l‘examinaziun dal tenent chi staiva eir sco ün i davant la cantina.

Insomma scha no observain quistas trais chosas a reguard nossa tura dad hoz, schi:

- pudaivat far l‘examinaziun in guardont las fotografias

- la sfuriada nu vaina fat!

- la descripziun dal fat prouva da far quia.

Da la fuorcla Champatsch giò‘n Tiral han güdà tuot ils sonchs. Davo esa stat da metter sü las pels ed ir bainin in lingia inaint ed amunt vers Davo Lais. Que giaiva sco aint ill‘öla, be quels davovart taloccaivan ün pa a crusch ed a traviers. Spezialmaing las singularitads dals differents clubs da skis in nossa regiun sun gnüdas trattadas in lung ed in lad. Da là aint e sü vers la fuorcla da Davo Dieu sun eir gnüds lodats, da plüssas varts, ils muossavias sten gulivs ed ils segns cotschens ed albs chi marcan la senda da stà. Passà il lai sü vers il Piz d‘eira gnü plü quiet. Tuots vaivan da sfolar avuonda. Sül Piz, esa stat da far sco adüna üna pruna chosas: dar ils bütschs, tour giò las pels, trar las s-charpas far marenda eui. Davò avair contemplà la bella vista eschna partits giò da Val Davo Lais, our da Pra San Flurin, our illa Muranza e giò dals Charetschs giò‘n Zuort. Da là lura cul taxi da la four‘oura.

Grazcha fich a Jon per il manar la tura ed a tuot ils partecipants: Tina, Andri, Cristina, Silvano, Berta, Linard, Anna, Thomas e Lilo per la buna cumpagnia.

 

 

Publizieren
 

Um einen Tourenbericht zu publizieren bitte zunächst hier registrieren. Falls bereits registriert, dann hier anmelden.